ديوانيه المنتدى

السلام عليكم

حبيت انزل موضوع عباره عن ديوانيه المنتدى

يعني يكون مكان للترفيه وتبادل الحديث بين اعضاء المنتدى >>مادري من وين يبت الحجي

المهم حياكم معانا بالديوانيه وآمرو تدللو شنو تبون اضيفكم واحنا بالخدمه

وعليكم السلام..
يلا انا اول الضيوف وين الحلو والقهوة geek

فكرة حلوة وانشالله الجميع يتفاعل معانا

بمااانها دوانيه بس مشتركه بس خل اشرب الجاي....

ياجماعه هالايام انا ملاحظ انه في شي قاعد يزيد وشي موزين سالوني شنو هالشي!!

اوكي سالتوني هالشي اهوا انه في بنات الله يستر علينه وعليهم وعلى من يسمعنه هابين بحركه انهم يقعدون يترقصونن بالسياره واشوفها انها زااايده هل اهيا نوع من انواع الفصله انا ماني فاهمها

اليوم طلعت من الميداني طبعا كنت قاعد اسبح بالبحر وانا راد البيت وله ثنتين يطقون هرنات واللي تسوق بطه قاعد تكسر رقبه وانا داق الزقاره مالي خلق منصلخ بالشمس

ادري انه السالفه مو ذاك الزود بس اللي ايينه من بره يقول بنات الكويت مايقول فئه معينه
وانشالله تنقطع باقرب وقت ويعطيكم العافيه afro

مطنشة الشباب كتب:: وعليكم السلام..
يلا انا اول الضيوف وين الحلو والقهوة
فكرة حلوة وانشالله الجميع يتفاعل معانا

هلا والله نورت الديوانيه بوجودج
يالله ياولد قوم ييب القهوه والحلو

تواجدج الااحلى يا قلبي

BishTa5taH كتب:: بمااانها دوانيه بس مشتركه بس خل اشرب الجاي....
بالعافيه
ياجماعه هالايام انا ملاحظ انه في شي قاعد يزيد وشي موزين سالوني شنو هالشي!!
شنو ؟؟
اوكي سالتوني هالشي اهوا انه في بنات الله يستر علينه وعليهم وعلى من يسمعنه هابين بحركه انهم يقعدون يترقصونن بالسياره واشوفها انها زااايده هل اهيا نوع من انواع الفصله انا ماني فاهمها
لووووووووووووووول تقدر تقول نوع من انواع قله التربيه وعدم احترام العادات والتقاليد الي سببه ضعف الرقابه من قبل الاسره

اليوم طلعت من الميداني طبعا كنت قاعد اسبح بالبحر وانا راد البيت وله ثنتين يطقون هرنات واللي تسوق بطه قاعد تكسر رقبه>>بطه ورقبه سكنهم مساكنهم
الزقاره مضره بالصحه ترى نصيحه اتركها << وانا داق الزقاره مالي خلق منصلخ بالشمس

ادري انه السالفه مو ذاك الزود بس اللي ايينه من بره يقول بنات الكويت مايقول فئه معينه
لا معاك حق اخوي صج ظاهره حيل منتشره وتأثر على سمعه بنات الكويت ومهما كان نوع الاستهبال ما توصل لي هالدرجه
وانشالله تنقطع باقرب وقت ويعطيكم العافيه

الله يسمع منك
ياريت يعجبكم رايي والاختلاف بالراي لا يفسد من الود قضيه

سلااااااااام عليكم يااجمااعه Smile

انا ما احب لا الجااي ولا القهموه ابي عصير فرش Razz

وصح ياخوي جم مره شفت بنت برووحها بالسيااره وتترقص .. الحمدلله والشكر بس
وانشالله يعقلوون بس .. لان احس كل وحده تقلد الثانيه .. والله يستر علينا وعليهم Smile

يعطيكم العافيه عالمرور والردود الحلوه والله يستر على الجيل الياي شكلهم مو بالسياره بيرقصون حتى بالشوارع

مسااااااااء الخييييييييييييييير

انا عضوه يديده

مرحباااااااااااااا
وين الجاي يا هييييه هههههههههههه عادي دوانيه المهم يلا منو يلعب كوت نبي ناس تلعب
ههههههههههه

المهم في شي صاير بالمعهد ماني فاهمه ليش المظلات حق البنات واحنا بطقاق ليش بعرف احنا عيالهم ولا يايين من جيبوتي والله ماني فاهم موطالبين ملايين نبي بس مظلات بس والله ترى والله ابجي اهي اهي اهي اهي اهي

لا ماكو <_<

قعدو بالشمس هذا انا قرار مسويته ممنوع المظلات للشباب

عقاب لكم <_<

<< مصدقه الاخت P:

مالت ههههههههههههههههههه

شفت هالموضوع حلو و من عنوانه ديوانية المنتدى يعني أقدر أقرق مني لي باجر ,,
مرحباااا يالربع شلونكم عساكم بخير .. اليوم مسوية لكم جاي بالنعناع و قهوة , و كيك الأوريو ..او اللي توه قاعد كورن فليكس و حليب وعصير geek

يالله ألحين ببدا بالسوالف و بكتب كل اللي يطري على بالي , و أتمنى ما أكون ثقيلة عليكم انا و سوالفي أقصد تقاريري هع ..
أنا ودي يكون لي جناحين تدرون ليش عشان أعيش الحرية بكل أصولها , مرات لما أشوف عصفور أقول جان زين لو انا نفسه , عاد قبل جم اسبوع حلمت إني أطير و تحتي النوافير اللي يطلع منها الماي و يروح فوق , اللي نشوفها بالأفلام , لي ألحين أذكر نفسي و أنا أطير وناااااسة Smile

, كذا مرة أحلم بالطيران المرة الثانية بحوشنا و لما بغيت أنزل كنت خايفة لا أطيح بس نزلت بحديقتنا على التراب هع , و مرة حلمت بواحد مزيوون يهبببل لابس شماغ أحمر و دشداشة بيضا و عبالي انه خالي و لما قربت خدي عند خده عشان أسلم عليه لاحظنا انا وياه ان احنا ما نعرف بعض فا كل واحد راح بطريقه ككككككك طلع مو خالي , صج غريب هالحلم , فيه أحلام نحلم فيها جنها فيلم و الا قصة خيالية ما تنحكى أو ما نعرف شلون نقولها لأنها خرابيط كل حلم يدش بالثاني يمكن هاذي اللي يسمونها أضغاث أحلام أما الرؤيا تختلف عن الحلم , و مرات لما أقعد من النوم أنسى أحلامي و مرات لا .. أتذكر بعضها و ما أنساها , أدري ما عندي ما عند ماي قراند ماذر , بس حبيت أقرق شوي <<< عندها وقت فراغ طويييل ..
انزين شنو معنى الحرية اللي تقصدينها ..؟
أنا أقولك الحرية امممم تصدق ما أعرف أترجم هالكلمة , لكن مو معناته إني أسوي اللي أبي و أطلع متى ما أبي , نو وي عمر الحرية ما ترجمتها بهالطريقة لكوني بنت أما الصبي عادي حتى لو يسافر بروحه نو بروبلم ناهي مشكيل , يمكن أترجمها إني ما أكون مقيدة بعادات و تقاليد مالها معنى في الشرع مجرد أشياء تعودوا عليها الناس أنا مع اللي يتمسكون بعاداتهم و تقاليدهم لأنه يعتبر تراث , لكن في عادات اللهم يا كافي فيها تعصب تشدد و مرات يكون فيها تدخل في شؤون الغير , أحس هالموضوع حيل متشعّب .. لكن اللي يهمني أكثر رأي الشرع في منهج حياتنا , و الا العادات و التقاليد عمرها ما همتني , يمكن يهمني بعضها لكن اللي ما فيه مخالفة للشرع ..
الحرية تعني أن تكون حر بدون أن يردعك أحد من شيء , لكن يوجد الكثير من الناس من يفهم معنى الحرية بشكل خاطئ من كل النواحي طبعا سواء باللبس طريقة التعامل مع الناس و أخلاق الشخص نفسه لكن أقول : لمثل هؤلاء أنتم فقدتم إحترامكم لأنفسكم قبل أن تفقدوا إحترام الناس .
أنا مع أنني حرة أعيش حياتي كما يحلو , لكن ليست بمعنى الكلمة لا بد من وجود حدود و ضوابط في حياتنا , لكن لدينا حرية الإختيار في عيش الحياة التي نريدها , ولن أحس بقيمة الحرية إلا عندما أفقدها , و أكبر مثال البشر الذين يعيشون في مقبرة الأحياء ألا و هو السجن , الله يعينهم على ما يقاسونه في هذا المكان , فهي تجرد الشخص من جميع مقومات الحياة الأساسية مثل : الدراسة العمل تكوين أسرة خاصة به التواجد مع الأهل و الأصدقاء متى ما يريد أمور كثيرة صراحةً و لا نستطيع أن نحصيها , فالحمدلله الذي عافانا مما ابتلاهم و فضلنا على كثيرٍ من خلقه ..

نعسااانة بس ما أبي أنام , أبي أشغل نفسي بشي غير النوم , و في شغلات كثيرة ودي أسويها بس مالي خلق , نومي معتفس من سنوات , أعدله يوم و عشرة لا , اشتقت لروتين المعهد , اشتقت لرفيجاتي و اشتقت لجو الدراسة اشتقت حتى لأكل المعهد هع , صج إن هالشي متعب بأني أداوم و أتعنى عشان المعهد بس بتكون تجربة حلوة , و انا قاعدة أنجز شي بحياتي حتى لو كان بسيط المهم إنه إنجاز , لكن عندي مخاوف بسبب الدراسة لأني مو سريعة في إنجاز الأمور و ما عندي سرعة بديهة و يا كثر ما أتنح في المحاضرة مع إن موادنا حيل سهلة مقارنةًً مع التخصصات الثانية , لكن مثل ما أقول دايما أملي بالله كبير و إن شاء الله تسهّل أموري و ما يكون في معوقات في طريق نجاحي , اهو أكيد بيكون في معوقات لكن مو لدرجة إني آخذ دور ثاني و أعيد كورس كامل و هذا اللي خايفة منه .

نينا في شغله نسيتي لا تقولينها كنتي دايم تقولينها بالاخبااار بس الحين ماقمنا نشوفها تدرين شنو هالكلمه؟؟؟؟؟؟

اهيا واشنننننننننننننننننننننننننننننننطططططططططططططططططططططططنننننننننن

خخخخخخخخخخخخخخخخخخخخخخخخخخخخخخخخخخخخخ

تعرفون المذيعه مالت تلفزيون الكويت الي بواشنطن الي كل ماتنهي كلامها تمد كلمه واشنطن كلام نينا والقرقه الزايده ذكرتني فيها ياهي اياااااام

يالله نينا تعيشين وتاكلين غيرها بس ثاني مره لاتنسينها

ههههههههههههههههههههههههههه .. ايي اذكرها لمن تقولها واشنطووووون مادري شلون تقولها هع ..
ايي شنسوي لازم نطلع المواهب اللي فينا و الا ما نرتااااح ..
وه فديتني أهبــل geek

<<< تعجبني هالكلمتين شايفتها في المنتديات

السلام عليكم ..
شلونكم يالربع عساكم بخير .. Smile

اليوم بتكلم عن شغلة لاحظتها في المعهد و خصوصاً في محاضرة الانجليزي , و بما إني بالكورس الثاني تخصص كمبيوتر مادة الانجليزي عن القراءة و الدكشنري سكيلز , و اللي صدمني إن و لا وحدة بالسيكشن مالنا تعرف تقرا انجليزي بطلااااقة , و أنا منهم Sad

أنا عادي أعرف أقرا لكن مو بكل ثقة يعني ما أقرى بسرعة نفس العربي يعني لو تجيبون قصيدة باللغة العربية عادي أعرف أقراها و نفس الشي لما أقرا قرآن لكن بالانجليزي الله لا يوريكم , و البنات حيل حيل ضعيفات بالقراءة مستوانا يفشل بالانجليزي يعني لو يجي مدرس أجنبي و يشوف مستوانا بيقول إن احنا عمرنا ما درسنا انجليزي , و هالشي شيدل عليه ..؟؟ يدل على إن تأسيسنا بالانجليزي يوم كنا بالابتدائي و المتوسط و الثانوي تأسيس طايح حظه و فاشل و ما منه فايدة ها الحين ندرس بمعهد دراسته بالانجليزي و مستوانا حيل ضعيف ..
و المدرسات خذوا الشهايد عشان يستفيدون منها مو عشان يدرسوننا بذمة و ضمير , اوكي احنا نجحنا و مشينا بدراستنا لين تخرجنا , لكن للأسف تخرجنا و احنا مستوانا غير جيد في اللغة الإنجليزية , انزين تخيلوا ناخذ اللغة الروسية و إلا الإسبانية أو الألمانية شبيكون وضعنا بنعيد سنة كاملة عشان هالمادة هع .. إذا الإنجليزي ما فلحنا فيه نفلح باللغات الثانية , أنا ما أحبطكم بهالكلام لكن هذا الواقع و اللي سبب هالمشكلة المدرسات و المدرسين احنا نقدركم و نحترمكم لكن للأسف تأسيسكم لنا ما جاب نتيجة حلوة و أكثرنا ضعيف من ناحية المحادثة باللغة الإنجليزية , بذكر لكم موقف مرة كنت رايحة لموعد في المستشفى مع أبوي و كان في واحد كندي متزوج بريطانية و أبوي ماشاء الله بلبل في الإنجليزي يسولف و يضحك معاهم و أنا شفتوا المزهرية لما يحطونها على الطاولة أنا جذي هع أفهم كلامهم بس ما أعرف أتكلم و لو بتكلم بقول بدليات هههههه نفس الايرانين اللي ما يعرفون عربي يخلون المذكر مؤنث و العكس لأنهم ما يعرفون أساسيات اللغة العربية و مو متأسسين و دارسين لغة عربية , احنا مثلهم ما نعرف أساسيات المحادثة بالإنجليزي :S
و أذكر المدرسات ما يتفاعلون بالصف إلا مع الشاطرة و اللي تشارك بحصتها أما اللي ضعيفة بالإنجليزي تعطيها ظهرها , هذا تعليم مو لعبة و يتعلق بمستقبلنا و مستقبل عيالنا بعدين , انا ما أعمم لكن اللي أذكره بمدارسنا إن المدرسات ما يخصصون حصة كاملة للريدنق Reading , ممكن يخلونا نقرى بس بشكل سريع عشان ننهي الدرس و ناخذ الكلمات و السيت بوك , عاد من عرفت الانجليزي كلمات و سيت بوك اهي اللي نجحتني بالانجليزي و إلا انا ميح بالقواعد Structure <<< صح السبيلينق مالها مو هع , لكن لما دشيت المعهد و بالتمهيدي درستني الاستاذة أسماء السيف و فهمتني اياهم غصببب <<< الله يذكرها بالخير خوش استاذة Smile

أدري أنا قرقة لا قرقاوية دايما ههههه و إن شاء الله تحبون قرقتي , لكن هالشي شاغل فكري هاليومين , اللبنانيين يتكلمون فرنسي و كأنها لغتهم الأم حتى الصغار لأن تأسيسهم للطلبة ناجح عكسنا تماماً , احنا كلمتين و يالله نقراهم , الله يرحم حالنا بس , أنا لو أروح أمريكا سنة و ارد الكويت تلقوني بغبغاء يتكلم انجليزي و ما يسكت <<< من امه شكووو هههههههههههههههه ..
أنا أفكر بأني آخذ كتابي الانجليزي مال التمهيدي لأن فيه قصص بالانجليزي أو أي كتاب و أقعد أقرا و أقرا عشان تتحسن قرائتي و تكون أسرع شوي , هذا الحل في نظري ..
و هم أنتوا تقدرون تشترون من المكتبة لو كتب أطفال بالانجليزي عادي المهم يكون عندكم كتاب يسهل عليكم القراءة ..
و في حل ثاني ناخذ دورة انجليزي كرمال نعرف نأرا منيح , لأن مستوانا بيخجل كتير كتير ..

اليوم صار لي موقف بالمعهد كنت أبي أصلي العصر و المصلى اللي تحت مقفول دايما ألقاه مقفول , و اضطر إني أروح للدور الأول و أصلي مع إنهم كاتبين games شكل اللي حط اللوحة ما يعرف عربي و اهو مصلى بالأساس و بعدها بأسبوع حطوا ورقة ملزقينها ع الباب و كاتبين مصلى للرجال :S يعني وين نصلي على أرضية المعهد ..؟؟!! ما في مكان فارشينه و يصلح للصلاة إلا المصليات , المهم كان في شباب ثنين داشين مبنانا مادري شكانوا يبون و كان معاي بنات عند المغاسل و أنا طالعةمن التواليت جمدت بمكاني فا ضحك واحد منهم و أنا أنزل بروح لرفيجاتي قلت شحقه شاق حلجه بالإبتسامة !! استغربت بعدين تذكرت شكلي لما جمدت بمكاني جنهم مجرمين مو شباب بمعهدنا هع امبيه لي ألحين أتذكر شكلي ههههههههههه و لا جمدت و قاعدة أطالعهم تصرفي كان غبيي و لا إرادي .. لي ألحين ما لقيت تفسير لهالتصرف scratch

مثل ما قال ولد عبس تعيشين و تاكلين غيرها ههههههههه ..

و خلصنا سوالفنا و سكرنا باب الديوانية , نلقاكم بديوانية ثانية <<< يا ملقيييي ههههههههههههه afro

هاااااي ..
طبعاً مثل كل مرة دايما أكون في الديوانية بروحي هع Smile

لكن مو مشكلة بنكتب و بنكتب لين تقطع أصابعنا هههههه <<< اسم الله علي لا فيني و لا في عدوي شفتوا الطيبة شلون تخلي الإنسان مسالم و لو بيحقد على شخص و من موقف معين , مع الوقت راح ينغسل قلبه من الحقد و الكره و يرد يعيش مرتاح البال و الضمير , أتكلم عن تجربة , رفيجتي تقول لي قلبج كبييييير لكن فيني سلبيات ما تكرهني في الشخص اللي جدامي , لكن عندي مشكلة مع الناس أو اللي مو مطيحة معهم ميانة مثل رفيجاتي لما أقابلهم أحس بالتكلف تجاههم , و ما أقدر أدش بالجو اللي اهم فيه , في شغلات في شخصي و ذاتي قللت من قدري كإنسانة و يمكن أنا اللي قللت من شأني و أشوف إني صغيرة بعين نفسي مادري ليش هالنظرة كل ما نسيتها و قلت خلاص انتهيت منها ترجع لي مرة ثانية , و اعيش في دوامة , لدرجة إحساسي بعدم مواجهة أشخاص معيينين في حياتي لأنني لا أستمتع بقربهم بل لم أجد مكان خالي بقربهم , و إن قابلتهم أكون قليلة الكلام , كلامهم تفكيرهم غير عن كلامي و تفكيري فحاولت أن اندمج كذا مرة معهم لكن لم أستطع لا أدري لماذا؟؟ , هن بنات طيبات القلب حبيبات , لكن صعب تكون مع أشخاص لا تجد لهم لك مكان بينهم , أنا تكلمت عن نفسي لأنني أحب المشاركة , و بما أني دايما أمر ع المنتدى اللي القاه مهجور أغلب الأوقات , أكتب فيه كلمات من صميم قلبي عشان أحرك و لو جزء بسيط في المنتدى ..
بعض المرات تنتابني مشاعر و كأن قلبي سيخرج من مكانه و يكون من غير سبب << جذيه من الله .. رغم طول صبري و انتظاري , لكن الإبتسامة و الضحكة لا تفارق شفاتي Smile

حياتي ليست جميلة بمعنى الكلمة , لكن يكفي بأنني لم أبتلى بأمور تحدث في العالم الخارجي , و الله و تالله و بالله بأنني مرتاحة من أمور لو أفكر بحدوثها لن يهنأ لي بال , و هو الإختلاط سواء في العائلة في مكان دراستي , فالإختلاط جعل الكثير منا يقع في شباك الإعجاب و الحب , لكن يسمى حب زائف ليس من ورائه خير , ممكن تعجب بإنسانة معينة , و أنتي أيضاً يا أختي ممكن أن تعجبي بشخص معين , لكن الكثير منا يكذب على نفسه و لا تنسون الشيطان فهو يزين هذا الشيء في عيوننا و قلوبنا , فهو شيء عابر سيتلاشى مع الوقت أو مع ذهاب او ابتعاد هذا الشخص , بنات شباب خلوكم واقعيين شوي و صريحين لأن الحياة مو حلوة إذا كثر فيها الكذب و النفاق و اللعب و الوناسة على قولتكم أي وناسة اللي تتكلمون عنها أي وناسة confused

, الحياة خلقنا فيها لأجل أهداف معينة و أيضاً سامية و ليس اللعب و اللهو طوال الحياة .. و كلنا درسنا هالشيئين عبادة الله وحده لا شريك له , و عمارة الأرض , و أي شي فيه خير لك و لغيرك راح تحصل على الأجر و الثواب العظيم و العكس صحيح ..
أتمنى أكون خفيفة عليكم في كل ما أكتب و في تعبيري عما في داخلي من آراء أو وجهات نظر ..
دمتم بخير أحبتي ~
I love you

راح أعتبرها مدونة بما إن ما كو أحد يمر و يكتب هني غيري ..
اول شي ,, أسعد الله أوقاتكم بكل خير ..
يوم الخميس رحت لبيت جدتي , و عبودي حبيب قلبي عطيته تلفوني و شغلت له نشيدة الونة اللي في قلبك << أحب أسمعها دايما Smile

, و اهو يسمعها قاعد يتعبث بتلفوني , و لما خذيت تلفوني منه شفت Deleting
, طلع ما سح كل الميوزك اللي بتلفوني :S , و اكيد أكثركم صار له مثل ما صار لي هع , بس اشوى انا محملتهم في الكمبيوتر , و شبكت الــ USB و سويت كوبي و بيست , و رديت كل شي انمسح , فا نصيحة لا تخلون الصغار يتعبثون بتلفوناتكم , لأن يمكن يمسحون ارقام او مسجات مهمة , أو صور و فيديوهات أو الميوزك مثل ما صار لي Smile

..

تمضي الأيام دون أن أحس بطعمها , لا أدري ما سبب إحساسي بالملل و الضجر و بشكل يومي , في البداية كنت متحمسة للدراسة , لكن لم أعد أستمتع في تكملة دراستي , فوالله فكرت أكثر من مرة بتركها , لكن إذا تركتها لن أتخلص من قصتي مع الملل , بل سأزيد الطين بلة , لأنني سأعيش في فراااغ طويل , فمالفائدة من الجلوس في البيت و زيادة حالي سوءاً , بعض الأحيان أحس بضيق شديد و لا أدري من ماذا ؟! فحياتي ليست مليئة بالمشاكل حياتي عادية جداً , لكن هذه الأيام كرهت الدنيا لدرجة قولي بأنني لا أريد شيء منها لا أريد ( .. لا أرى أي جديد فيها أنا أظن هذا سبب مللي الرئيسي , لكن قبل كل شيء أنا إنسانة مؤمنة و لله الحمد و لا أركض وراء دنيا فانية , و انا على يقين بأن الغد سيكون أفضل و أحسن , إن شاء الله .. sunny

و يمكن سبب الملل هو فقدان شيء لا يستطيع جميعنا العيش بدونه , فقلبي أحس بأنه يميل لشيء كالسراب ليس له وجود في حياتي , لا أدري هل يوجد أناس يمرون بمثل حالتي , فأنا أمر بحالة يرثى لها Neutral

, لكن يجب أن نقول دائماً الحمدلله على كل حال .. و لا ننسى حديث الرسول صلى الله عليه وسلم في آخر الحديث : " من رضي فله الرضى , و من سخط فله السخط " .. و من خلال هذا الحديث أجبر نفسي على عيش الحياة أياً كان شكلها أو لونها .. <<< أدوس على نفسي دوس عشان أقتنع بحياتي و باللي يصير فيها .. و هذا الحل في نظري , يعني تبوني ألطم و الا أشق هدومي و الا أقط نفسي من الدور العاشر هههههههههههه .. يا كثر ما أقرى حالات الإنتحار بالجريدة اللي بالصفحة الأخيرة , الله لا يبلانا ..

.. كل المشاعر ذبلت مثل الورد يذبل ليا صار ظميان ..

دمتم بخير أحبتي ~

السلام عليكم ..
اشتقت لكم What a Face

تصدقون مرات و أنا حاطة راسي ع المخدة أفكر بمواضيع و جني قاعدة أكتبها و أنقلها لكم ..
مادري أحس الكتابة و خاصة ع الكمبيوتر صار شي يجري بدمي , لكن في سؤال ببالي , هل ما أكتبه و من صميم قلبي له فائدة , أو مجرد كلام يُقرأ و تمشون من هالصفحة ..؟؟

ودي يا أعضاء يا حلوين تتفاعلون بهالموضوع , من اسمه ديوانية تكلموا بأي شي تبونه , نبي نحرك المنتدى شوي , تعبنا و احنا ننادي لكن لا مجيب Sad

, و هالشي ماراح يحبطني و بحاول قدر المستطاع المشاركة في المنتدى ..

بالأمس جلست أفكر بشيء الكثير منا ابتعد عنه و لم يترك له حيز في حياته , ألا و هو الحوار , تلقون أكثر الأزواج ينفصلون عن بعض و يتطلقون بسبب قلة الحوار بينهم و في معلومة تقول إن الطلاق وصل لنسبة 99% بسبب عدم وجود حوار بين الزوجين , يعني الكل يسوي اللي براسه بدون تفهم للطرف الآخر , محد يتكلم و يقول للثاني شنو همومه مشاكله , و إذا الزوج أو الزوجة ما تكلموا و خصصوا وقت للحوار , محد راح يفهم الثاني , أنا شدراني عن اللي في داخلك ياخي تكلم قول اللي بخاطرك لا تترك مجال لسوء التفاهم على أتفه الأمور , و نفس الشي الزوجة لا تبوزين و تسكتين تكلمي بس لا تصيرين مثل المسجلة للللللل , لا أكبر غلط لأن يمكن ينزعج و ما يحب يسمع منج كلمة وحدة , لازم تحددين الوقت المناسب للحوار الخاص بينج و بين زوجج , صدقوني مع إني ما قد عشت مع رجل يختلف عني بكل شي من ناحية الطباع و التصرفات , لكن أتكلم عن وجهة نظري و عن اللي أعرفه و شفته , و أنا أعترف بأن عندي نقص في الخبرات و أنا ليش قلت فيني نقص في الخبرات ؟؟ لأن ما عندي تجارب , لأن من خلال تجاربنا في الحياة نقدر نكتسب خبرات كثيرة و نعرف شلون نتصرف , و لما تصير الصجية و أتزوج , إن شاء الله أكون قدها و أتصرف بعقلانية و أصير خوش مرة , لأن يمكن فيني شغلات لي ألحين ما اكتشفتها و راح أكتشفها مع الوقت و هم مع التغيرات اللي راح تصير بحياتي ..
أنا يا ما قللت من نفسي و ذاتي , لكن و الله احنا فينا الخييير و فينا ايجابيات شكثرها لكن ما نبينها لأنفسنا و للناس , اهم شي الطيبة و سلامة الصدر في علاقاتنا مع الناس , في بنات كله يحقدون و ما يعجبهم العجب و هالشي شفته في بنات أعرفهم الله يعفى عنا و عن خلقه , و حقدهم يكون سواء من ناحية البنات أو الأساتذة , ايي ليش اهم مو ناس بشر مثلنا و ما في أحد كامل , لابد يكون فينا نقص ما كامل إلا وجهه سبحانه , و الله أكتب و انا منقهرة , و إذا شفتوا شي في الشخص اللي جدامكم يا تصارحونه بهالشي و تتفاهمون معاه و الا تتقبلونه بزينه و شينه , ترى والله تتعبون و إنتوا ما تدرون , ليش ديننا نهانا عن الحقد و الكره و البغض , عشان سلامة صدورنا لأن يمكن مع الوقت تصير مثل المرض لدرجة كرهكم لأقرب الناس لكم , و الله أختي شفت فيها شي يزعجني صج بعصب بتنرفز منها لكن مع الوقت عادي بنسى و بتقبل هالشي فيها , المشكلة أكثر الناس عبالهم راح يعيشون مع ناس على هواهم و إذا ما عجبوهم احقدوا عليهم اييه ليش الحقد !!!! ترى الحياة قصيرة و ما يسوى إن احنا نعيشها في حقدنا على فلان و علان , و لا تنسون إن الطبع يغلب التطبع , لأن ممكن تجامل و تسوي روحك طيب و حبوب و إنت عكس هالشي و مع الوقت راح تبين على حقيقتك فا ليش النفاق !!؟ , تعلم على الطباع الزينة اللي تحبب الناس فيك من أول لقاء بينك و بينهم , شي حلو إن الناس كل ما يذكرونك , يذكرونك بكل خير ..
و بما إني ما ارتبطت برجل و عشت مع ناس عمري ما عشت معاهم , فا قعدت أفكر يمكن أشوف شغلات ماراح تعجبني و ما قد شفتها و أنا عايشة ببيت أهلي مثل : تصرفاتهم طريقة حياتهم المكان اللي بعيش فيه حتى أكلهم لأن كل شي راح يختلف و يصير غريب علي في البداية أصلاً راح أستنكر الحياة بكبرها لكن مع الوقت راح أتعود , فا لازم نعلم أنفسنا على تقبل الحياة كما هي و الإقتناع بكل شي يصير بحياتنا في أي مكان نكون فيه , في بيت أهلي بيت زوجي مكان دراستي شغلي في المستقبل , نقدر نبرمج أنفسنا على تقبل الواقع اللي نعيشه سواء في وقتنا الحاضر أو في المستقبل , و احنا ما نقدر نغير شي في حياتنا إلا لما نتغير من الداخل .. فا اللي يبي يتغير يبدأ مع نفسه يدش داخل و يشوف شنو الشي اللي ما خلا حياته تتغير , بعدين يغير المحيط اللي هو عايش فيه ..
مادري احس كلامي ملخبط أو ذكرت رؤوس أقلام عن وجهة نظري و أتكلم بصيغة الجمع أو المفرد , لكن المهم هو هدفي من كتابة هالموضوع , و الكلام اللي كتبته موجه لي و لكم , و إن شاء الله تستفيدون من كلامي .. و أي خطأ تشوفونه من خلال اللي أكتبه لا يردكم إلا لسانكم و راح أتقبله بكل رحابة صدر ..
اليوم لمن قعدت من النوم حسيت بأن في حب كبيييييييير بداخلي , و طبعاً حب تجاه كل شي بهالدنيا , و ما أعرف سبب هالشعور , شي غريب مو ..؟؟ scratch

لكن و الله و تالله و بالله بإني أحس براحة ما بعدها راحة لأن ما كو شخص حاقدة عليه أو كارهته , و إن شاء الله قلبي يضل أبيض حتى لو تغير الزمن ..
ما ودي أوقف عن الكتابة لكن مصختها مثل كل مرة هههههههه Very Happy

ايي خلاص آخر مرة , لأني تذكرت شغلة , مرة و احنا بالسيارة رادين لبيتنا , قعدت أتكلم مع أبوي و طبعا أبوي مرات ما يفهمنا و يشوف إن احنا الغلطانيين , اوكي احنا مو ملائكة لكن الأهل مرات يقسون على عيالهم و يشوفون إنهم دايما غلطانين , و هالشي ممكن يسبب البعد بيننا و بينهم حتى لو كنا عايشين ببيت واحد , المهم : مرات لما نتكلم بموضوع معين مع أبوي يعصب و يتنرفز لأنه مو متفاهم أحيانا فا يعصب و يتنرفز , و أمي بالسيارة طبعا تركب جدام فا تسكتنا بتأشيرة منها هههههههههه ما أنسى شكل ايدها و اهي تحاول تسكتنا , لأنها ما تبي أبوي يتنرفز و لأنها عارفة أبوي ما يكون متفهم دايما , و لما تكون جنبي تقرصني ههههههههه , و أنا ما أحب أسكت إذا أحد فهمني غلط , فا لازم أتحاور و أتكلم مع الشخص اللي جدامي , لكن لما عرفت إن أبوي مو متفهم دايما أسكت مرات و ما أجادله في شي , و اقول إن شاء الله ما يصير خاطرك إلا طيب , لأن ماراح يهدا الوضع إذا ما في أحد تنازل , فا بما إنه أبوي تاج راسي أتنازل و اهدي نفسي و أقول له كلام يطيب خاطره حتى لو ما طاب هههههه , أبوي و الله طيب و حنون و يحبنا لكن فيه سلبيات تخرب عليه , لكن احنا متقبلينه بكل ما فيه , يكفينا وجوده بحياتنا , لأن من دونه راح نضيييييع , و أولهم اخواني لأن ما نقدر نراكض وراهم وين ما يروحون ..
اذكر لما وصلنا البيت من عقب مشادة كلامية مع أبوي قعدت أكلم أمي , و قلت لها : يما ليش نسكت ليش ما تخلوننا نتكلم و نتحاور مع بعض و نبدي راينا في أي شي يخطر على بالنا , لما نتزوج و يصير عندنا عيال شلون نتحاور معاهم و احنا لما كنا عند أهلنا ما نتحاور و نبدي راينا , و هالشي أكيد موجود بكل البيوت , فا يا آباء و يا أمهات يا نظر عيوننا و يا سبب بسمتنا في الحياة , و يا سبب رضا الله عنا , حاولو تخلون لعيالكم مجال للحوار و إبداء الرأي , لأن هالشي راح يفيدهم ألحين و بعدين .. رجاءاً لا تستخفون فيهم لأن بعض الأحيان ممكن تكونون على غلط و اهم على صح ..

دمتم بخير أحبتي ~

السلام عليكم ..
جمعة مباركة على الجميع ..
اللهم صلي وسلم على نبينا محمد ..

هاليومين المنتدى نايم , قلت أخليه يصحصح شوي Smile

اليوم الجو عجييييييييب , و أنا أصلي قبال الدريشة جاتني نسمة هوا قوية , ما أحلاه من شعور , صج صج أجواء لا تعوض , و خاصة في الطلعات , اليوم قلت للوالد يبا تطلعنا و الا نروح للسوق خو ما بقى شي ع العيد , قال لا هاذي و لا هاذي ههههههههههه , لا جا العصر يصير خير , مادري اليوم الجو ذكرني بشغلات و ذكريات شكثرها و صج صج حنيت لها ..

تصدقون اني مارحت للبحر الا يمكن مرتين بالعطلة Sad

اهي اهي , عاد انا اموت بشي اسمه بحر , لما نروح للبحر بس أقعد أطالعه و أسرح بفكري , البحر يشيل همومنا بدون لا يحس بثقلها , فيه سكون عجيب , عاد انا حلمي أسكن ببيت قبال البحر<<< تعيش في أحلام اليقظة ههههههه

أذكر لما رحنا لشاليه بالسعودية لكن بحرنا أحسن من بحرهم هع بس بحرنا وصل للمد الأحمر للأسف

, المهم في باب كبير يطل ع البحر أول ما وصلنا للشاليه كانت الشمس توها طالعة واااااو ما أنسى هذاك المنظر , في أحلى من هيك منظر ؟؟

خلونا من البحر Smile

,,
الدنيا و همومها و مشاغلها ممكن إنها تبعدنا عن أقرب الناس لنا , لكن لو تبعدنا منهم بيضلون في قلوبنا
و بيطرون ع البال دايما , لأن قلوبنا تحبهم و تحِن لهم لا غابوا عنها .. <<< ودي أكتب بعد لكني نعسانة و مالي خلق لشي .. Neutral

أنساك لحظة و أذكرك باقي العام حتى و أنا ناسي نسيت و تذكرتك ..

في أمان الله ~

السلام عليكم ..
مساء الخيرااااات ,, What a Face

من بعد عطلة مدتها اسبوع أو أكثر رجعنا لروتيننا اليومي الشبه ممل , لكن رجعت و أنا كلي أمل بتحسن حالتي من ناحية الدراسة , لأن نسبتي الكورس اللي طاف ما تبشر بخير , و عندي ثلاث كورسات أٌقدر أوقف فيها مرة ثانية و أكمل مشواري في الدراسة , و بما اني بالكورس الثاني و بالكورس الثالث بنختار تخصصين قررت أختار تخصص تشغيل حاسب آلي نظراً لصعوبة البرمجة بالنسبة لي اللي هو الصياغة , غريبة حالتي يوم أكون إنسانة طموحة كلها نشاط و حيوية , و يوم أكون إنسانة كسولة مالها خلق لشي حتى لو كان هالشي يتعلق بمستقبلها , لكني متمسكة فيه حتى لو مليت أو زهقت من هالشي , يمكن تمسكي فيه هو اللي خلاني ما أبتعد عن هالحلم أو هالطموح , مع إنه طموح بو طقة هههههه يعني مادري أطمح لأشياء شكثرها بحياتي لكن تمر لحظات بحياتي تخلي هالطموح يضعف و يصير هزيل ما يقوى على القومة من مكانه , هل يوجد أشخاص يمرون ما أمر به ..؟؟ فساعات أشعر بأنني وحدي في ما أمر به من مواقف في حياتي ..!!

و بالنسبة للحجاج اللي ردوا للديرة الحمدلله على سلامتكم و حج مبرور و سعي مشكور و ذنب مغفور بإذن الله تعالى ..
كنت أتمنى إني حاجة هالسنة لكن ما استعدينا , و بإذن الواحد الأحد راح أحج انا و خواتي و أخوي الكبير و أبوي السنة الجاية Smile

, يقولون الحج مثل الجهاد ما في راحة كلش , لكن من ندري إن احنا راح نرد كيوم ولدتنا أمهاتنا يهون علينا كل تعب نمر فيه في الحج , يا سبحان الله صج هالفريضة شيء عجيب ,و تتخلله الأجواء الإيمانية من كل جانب , فالحمدلله الذي هدانا لهذا و ما كنا لنهتدي لولا أن هدانا الله , وبالنسبة لنا كشباب و بنات و في كامل صحتنا و إذا كنا قادرين مستطيعين على الحج لا يمنع من أداءنا لفريضة الحج , و اللي ما حج هالسنة يحاول إنه يحج السنة الجاية , و يخليه هدف من أهداف السنة الجاية , مو تتكاسلون و تقولون مالنا خلق .. تقدر تحج حجة وحدة بحياتك , و إذا تبي تحج مرة ثانية فخير و بركة ماراح نخسر شيء بالعكس بتكون فرصة لزيادة الحسنات و محو السيئات ..

دمتم بخير أحبتي ~

السلام عليكم ..
Sad

المنتدى شنو يبط الجبد , امبيه مو صج مو صج مو صج , يالله إذا ما في أحد بيقرا ألحين في اللي بيقرا باجر Smile

.. أهم شي ما أكتب للطوف اللي جدامي هع

اليوم قعدت من الساعة 2 الصبح , قمت و انا شبعانة نوم لأني نمت قبلها بثلاث ساعات او أكثر , نزلت للمطبخ و سويت لي كوب نسكافيه 3 في 1 هع و شغلت التلفزيون على قناة الكويت الثانية عاد تلفزيوننا اللي بالمطبخ فيه قناتين الكويت الأولى و الثانية و ان زدنا الكويت الثالثة هههههه فا كل ما اقعد بالمطبخ احط الثانية ارحم شوي , المهم شفت فيلم هندي عجييب و كان أحلى فيلم هندي شفته , و تعاطفت مع الفيلم هههههه بس قصته كانت غير ما كانت رومانسية اكثر من ما هي إنسانية , و اذهلني الجمال الهندي فعلا جمال شرقي أصيل بدون عمليات تجميل بدون نفخ ووجه ما نقدر نشوف شنو الطبيعي فيه ..؟! , للأسف هذا اللي أشوفه في الإعلام العربي , مو كافي التصنع اللي هو فيه يطلعون لنا بشكل مصطنع بعد , ما أحلى الجمال الطبيعي مع شوية تعديل قلنا شوي مو توصل لدرجة تغيير الخلقة اللي الله خلقنا عليها و ميزنا فيها عن باقي المخلوقات , في وحدة معانا بالمعهد الله يستر علينا و عليها قبل لا تتزوج كانت حلوة و لما تزوجت طبعا شفتها في المعهد خدودها من كبرها ما عاد صارت تبين عيونها ترى انا حيل ابالغ هههههههههه بس صج تغيرت و ما عجبني هالتغيير , ايي ليش هالتغيير كل هذا عشان الزواج ..؟؟ ايي شنو تزوجتي ارتبطتي برجل ممكن الوحدة تهتم بحالها أكثر لكن ما توصل لدرجة تغيير خلقة ربي , ما أعرف راي الرجال من هالناحية , لكن أشوف انهم يحبون الشيء الطبيعي اللي على أصوله , و الله حرام في ناس الله معطيهم جمال منعه عن غيرهم ليش ما يحمدون ربهم و يحافظون على هالنعمة , من اسمها نعمة و راح تزول بلمح البصر سواء من الانسان نفسه و الا من الله بعيد الشر عن الكل , و يا كثر اللي لعبوا بوجيههم لدرجة التشوه و انا شفت هالشيء على برنامج اوبرا وينفري , طلعو وحدة اللهم يا كافي عندها هوس بعمليات التجميل تنفخ هذا و تنحت بهذاك و يالله دام عندها رصيد راهي بالبنك قالت ألعب بهالفلوس على نفسي , المهم من كثر ما سوت عمليات بخشمها وصلت لمرحلة ان الدكتور قال : إذا سوينا لج عملية ثانية بخشمج راح ينهدم <<< عمارة مو خشم هههههههههههههه , و من كثر عمليات التجوية و التعرية اللي سوتها بخشمها هههههههههه ما عاد صارت تتنفس مثل قبل و كل ما تقعد الصبح تاخذ أعواد الأذاني و تفتح خشمها عشان تقدر تتنفس اللهم لا شماتة , هذا جنون مو هوس , ترى اللي قلته و لا شي بالنسبة للي سوته بنفسها , سوت عمليات من راسها لي رجلها ما دري شخلت هالانسانة ؟!؟ , طبعا طلعوا لنا صورتها قبل العمليات تهبببل شحلاتها يومها على طبيعتها على الخلقة اللي الله خلقها عليها , امبيه شي يقهر و الله و على فكرة ترى الشيطان أقسم على نفسه بأنه يوسوس للإنسان عشان يغضب ربه و فعلا صار اللي اقسم عليه أعدا عدو للإنس, يا بنات نصيحة لوجه الله حطوا ببالكم ان الله خلقنا في أحسن تقويم ما في شي ناقصنا , لا تدققييين في المنظرة و تطلعين عيب يمكن مو موجود بس وساوس الشيطان شغالة ليل نهار و ما ننسى الاهل و الصديقات أو اللي بالصالون أو حتى الإعلانات , ايي اهتمي بشكلج صيري عالموضة لكن الوجه ابعدي عنه لأن ياما حريم اختربت وجيههم بسبة هالعمليات اللي اسميها عمليات تبشيعية , تقلبج و تخليج جيكرة , و طبعا هالشي عكس اللي تبيه و تطمح له كل بنت انها تكون جميلة و الكل يمدح بجمالها , خدود براطم غمازات لو العين يقدرون يسوون فيها عمليات تجميل جان سوو بعد كل شي جايز , حرام الله عطانا و تفضل علينا نرد له هالشي بأن احنا نخرب الشي الحلو اللي عطانا اياه و حرم غيرنا منه ! , انا مع اني بنت مثلكم بس استغرب منكم هالشغلات و لا راح أفكر أسويها , لأني على يقين إن الناس ما تحب تشوف شي مصطنع تحب تشوف شي طبيعي , حتى لو كنت كاشخة و مغطي وجهي المكياج على الأقل لا غسلت وجهي يقدرون يتقبلونه حتى لو فيه شوية عيوب , مو العب بوجهي و اخربه ساعتها يالله منو بيرد وجهي القديم ..؟ و لا أحد طبعاً لأن اللي ينكسر عمره ما يتصلح , و حتى لو بيتصلح ماراح يرجع مثل الأول لو تنطبق السما على الأرض , الأنثى من الله خلقها و اهي مطبوعة على حب التزين و لبس أحلى و أحسن الثياب أيضاً تحب تستعرض و تبهر اللي حواليها بجمالها لأنه شي اهي مفطورة عليه , مفهوم الجمال عند بعض الناس مفهوم خاااطيء لأنهم ما يعرفون شنو معنى جمال بس من يشوفون الفنانة الفلانية و الا المذيعة الفلانية راحوا و قلدوها تقليد أعمى , و إذا بتسأل ليش ..؟ تقول أبي أصير مثل الفنانة الفلانية ايي ليش انتي توأمها و انا مادري ..؟! , كل وحدة فينا تملك جمال يميزها عن الثانية و انتي اللي تقدرين تلقينه بنفسج مو تقلدين فلانة و علانة , شوفي شنو اللي يناسبج لا تطالعين الناس , التقليد الأعمى شيء سلبي أشوفه في مجتمعنا و كل وحدة تتحدى الثانية في منو تكون أحلى و كأن الحياة مسابقة لملكات الجمال , و كأن الحياة أهم شي فيها الجمال , اوكي انا معاكم هو شي مهم لكن ما نخلي حياتنا تتمحور حول هالشي , الحياة لا بد يكون فيها أهداف و قيم مبادئ سامية بعيدة عن الأمور الدنيوية البحتة , يا كثر من غيرت خلقة ربها و ندمت و انقلب جمالها إلى جكر , و أنا أقول عليها من الله ما تستحق , مو انتي خطيتي لهالشي برجلج تحملي نتيجته , الله يكفينا شر الدنيا لأن فعلا قاعدة أشوف فيها أمور ترجعنا لورا , و بما إن احنا نرجع لورا ما في تقدم ما في تطور ما في ازدهار مافي إلا خيبة الأمل .. الله المستعان ..

منتدى مخيب للآمال <<< يناسبه هالاسم مو ..؟؟ What a Face

السلام عليكم ..
صباح الخيرااات ..
Sad

و الله مليت من هالحالة ليش ما في أحد يلتفت لهالمنتدى ؟! شنو عشان انا اشارك فيه يعني ههههههههه , عاد هذا أول منتدى أسجل فيه و حتى لو بسجل في منتدى ثاني راح أرجع لهالمنتدى مع إن طاااايح حظه بس حبيته عشقته تعودت عليه و دام إني أشبك على النت أغلب وقتي لازم أمره , لكن أمره و أنا وجهي جذيه Neutral

, ما في شي جديد كل شي على حاله ما تغير , حب الخير و مساعدة الناس و نشر الفائدة شي مغروز فينا لكن للأسف ما نبادر بهالأمور عشان يكون شي نلمسه في حياتنا سواء بهالمنتدى أو بحياتنا الواقعية , من كثر ما قابلت هالمنتدى كرهت شي اسمه نت لأن ما فيه شي واقعي , حتى لو صدقت النيات لكن ما يمنع ان احنا نشارك و نحرك هالمكان اللي خالي من أي نشاط , انا أكبر مثال على عدم المبادرة في الخير اني من زماااان أفكر أتبرع بدمي لبنك الدم و لي ألحين ما رحت Sad

أصلا منو يوديني محد فاضي لي , بس صج لازم أروح دام اني أقدر على المساعدة و الله كل ما أشوف الإعلانات مالت بنك الدم أتحمس أكثر و أقول لازم أروح و أتبرع بدمي , لأن قطرة من دمي راح تنقذ ناس بين الحياة و الموت , و دايما أفكر بالعمل التطوعي بس ما أعرف وين أروح , انا أحب شي اسمه عمل جماعي عشان الخير , سواء في الدراسة أو في الشغل لا توظفت ان شاء الله , و ما أتحمس إلا لما أكون قاعدة الصبح و فااااااضية صج ما عندي شي أسويه بالبيت غير التلفزيون و النت , عشان جذي تشوفوني أقرق ليل نهار بهالمنتدى , و يا كثر ما زلت رجلي من كثر هالفرااااغ لكن بعدها ترجع للصراط المستقيم , و الله زهقت من هالتخبط سواء في تصرفاتي أو مشاعري , و هالشي أكيد موجود بحياتكم كشباب و كبنات في نظركم ليش أكثرنا يتخبط و يغلط في هالمرحلة هل لأنها مرحلة مفروض نكون فيها ناس متزوجين مسؤوليين عن بيت و عيال عشان ما يكون عندنا وقت فراغ طويييل ..؟؟ هل عدم وجود الحب في حياتنا يولد عندنا فراغ عاطفي حتى لو كنا بين أهلنا و أصدقاءنا ..؟
و هالفراغ سبب لنا هالمشاكل اللي نشوفها , اوكي أنا معاكم الزواج قسمة و نصيب , و ماراح أقعد طول عمري أنطر الباشا على ما يدق بابي مع إن الزواج شي من أهدافي المستقبلية , و أنا ما قلت إنه هدف إلا لأني متأكدة أن الحب و الاستقرار ماراح ألقاه إلا من ورا ارتباطي برجل مو من ورا هالدنيا اللي كثر فيها اللعب و الوناسة في هالوقت , شنو هي طريقة تفكير هالجيل هل تؤيد فكرة الزواج المبكر و إلا تحب تأجيل هالمشروع و تخلي الدراسة و الشغل على حساب الحب و الاستقرار , بنظركم الحياة حلوة من دون الحبيب و إلا مملة ..؟؟ الحب شعور سامي و حلو لكن أكثر الناس يتجاهلونه أو يعيشونه بطريقة غلط و بالأخير ينتهي كل شي و كأنه شي ماصار , أو يقولون إن هالزمن ما فيه شي اسمه حب ! , و الله منكم انتوا اللي نحشتوا المشاعر الصادقة من قلوبكم و ما خليتوا لها مجال تعيش في قلوبكم , الأفكار متشتتة ألحين و إلا جان كتبت أحسن من جذيه , و لا يسعني أن أقول إلا الله يهدينا و يثبت أقدامنا على طريق الخير و الصلاح و إن زلت يوماً ترجع إلى طريقها الصحيح قبل فوات الأوان ..

ماصارت ديوانية هع صارت مدونة مع إن عندي مدونة بس كله أقول مالي خلق أمرها , أحب أكتب و أعبر بهالمنتدى Neutral

أتمنى أمر هالموضوع و ألقى أحد غيري كاتب شي أتمنى و كلي إحباط منكم Neutral

تشااااو ~