عدد الرسائل : 825 المهنة/التخصص : كمبيوتر تاريخ التسجيل : 23/08/2009
موضوع: كلمة لأعضاء المنتدى ~>~ الإثنين يناير 04, 2010 9:45 am
السلام عليكم و رحمة الله و بركاته .. شلونكم شباب و بنات المنتدى .. إن شاء الله بخير ..
طبعا كلامي اللي بقوله موجه لكم يا أعضاء المنتدى .. و لو ان محد راح يكون مجبور على شي .. بس حبيت اقول جم كلمة .. و ان شاء الله تتقبلون كلامي بكل رحابة صدر .. و الله ما كان ودي اكتب هالموضوع .. و اكيد بعض الناس بيقولون شتبي هاذي .. غصب نشارك .. بس انا حييل مستغربه من هالمنتدى .. يعني مرات ادش بس القى اسمي موجود .. حتى كلمة زائر عندها زييييرو .. و اذا كثرو 2 او 3 زوار .. يعني ليش ما في احد هل لانه منتدى حق المعهد !!؟؟ او شنو بالضبط .. يعني على كثر الاعضاء اللي مسجلين كلهم مختفين ما في احد كلللش .. لا ماشاء الله عليكم حييل مقطعين روحكم من الدراسة ..هي ترى اتغشمر او استعبط او املق اللي هو .. و الا اكثرنا جذيه قاعدين يلعبون .. بس الحمدلله اني في هالمعهد صج انا حيل حيل مرتاحة و ما شفت صعوبة من المواد .. بس الرياضيات و قواعد الانجليزي أخربط فيهم شوي .. و الطباعة احس اني حييل بطيئة لما اكتب ع الكيبورد .. ماشاء الله ما خليت شي .. بس والله كل شي سهالات .. ما في شي صعب .. انتوا شدوا حيلكم شوي و فالكم طيب .. .. ما في حركة في المنتدى .. ما في اعضاء يحطون مواضيع عشان نتناقش فيها .. انا مرات لما ادش منتدى حتى الردود اقراها مو بس الموضوع .. لان بعضهم يقولون وجهة نظرهم من خلال الموضوع اللي حاطينه .. و الله هالمنتدى حيييل متواضع و بسيط و صج ان الاقسام اللي فيه شوي .. بس ما يمنع ان احنا نبدع و نحط مواضيع تفيدنا و تفيد غيرنا .. بس ناقصه الاعضاء اللي يخلون المنتدى شغال ليل نهار .. مو نايم على طووول .. اوكيي احنا ورانا دراسة و مشاغل الدنيا ما تخلص .. بس ما فيها شي اذا قعدنا شوي و حطينا جم موضوع في المنتدى .. يعني الاعضاء اللي في المنتديات الثانية بطاليين !! لا شغل و لا مشغلة بس مقابلين النت .. اكيد عندهم دراسة و وراهم مشاغل ماراح تخلص لي آخر العمر .. بس اكيد بيكون عندهم وقت فراغ .. و انا لاحظت شغلة مادري اذا بتوافقونني بهالشي او لا .. ان اكثر شباب و بنات الكويت عندهم وقت فرااااغ طويييل .. و لا فوق هذا نضيعه على شي ماراح يفيدنا لا ألحين و لا بعدين .. انا اولكم .. بس من دشيت هالمنتدى قعدت احط مواضيع و لو ان اكثرها مواضيع منقوله .. بس بعضها تعبر عن شخصية كاتب هالموضوع حتى لو مو اهو اللي مسويه و تاعب عليه .. و الله انا قبل امسك ورقة و قلم ابي اعبر عن اللي بداخلي بس ما اقدر .. بس من دشيت هالمنتدى حبيت شي اسمه كتابه .. الصراحة استمتع لما اكتب و اعبر عن رايي بكل عفوية ,, هالمنتدى يبيله رفريش عشان يتحرك شوي .. يعني انتوا طلاب و طالبات هالمعهد حتى لو تتخرجون و تتركون هالمنتدى بعد فترة راح يكون اسمكم محفور في هالمنتدى .. راح يجون غيركم و يستفيدون من المواضيع اللي كتبتوها .. اشوف ان الناس يستحقرون ابسط الامور مع ان هالامور راح تؤجرون عليها .. اكبر مثال :: السلام , الابتسامة , الكلمة الطيبة .. لأن مرة لما كنت بالمعهد كان في وحدة مارة و انا امشي قلت السلام عليكم و قعدت تخزني يعني تبي تشوف اذا تعرفني او لا بعدين راحت .. طبعا ما ردت السلام .. يمكن اخترعت مني احنا الحمدلله فينا خيير بس نستحقر هالخير اللي فينا .. ما نبينه للناس .. ليش حاقرة هالشي دامه راح يخليني اكسب أجر من الله .. و محبة الناس لي !! قال رسول الله صلى الله عليه و سلم : (( لا تدخلو الجنة حتى تؤمنوا , و لا تؤمنوا حتى تحابوا , ألا أدلّكم على شيء إذا فعلتموه تحاببتم ؟ أفشوا السلام بينكم )) . وفي الحديث المتفق عليه أن رجلاً سأل رسول الله : أي الإسلام خير؟ قال: (( تطعم الطعماء، وتقر السلام على من عرفت ومن لم تعرف )) . و أتمنى من إدارة المنتدى .. نشر المنتدى في أكثر من موقع ..